ඥානම්මලා ගැන මගේ සත දෙක

එකෝමත් එක දවසක මම යම් නීති කටයුත්තක් පිළිබඳව උපදේශයක් ගන්න මගේ මිතුරු ජ්‍යෙෂ්ට නීතිඥ මහතෙක් හමුවුනා.ඒ නීතිමය කරුණු කතා බහ හමාර කරලා එන්න ලෑස්ති වෙද්දී එයා මට මෙහෙම කියනවා.”මචං,උඹට නඩුව දිනාගන්නම ඕනම නම් මම වැඩක් කියන්නං.අනුරාධපුර පැත්තේ ඉන්නවා …………………. කියලා මෑණියන් කෙනෙකුයි ,……………………….. මහත්තයා කියලා කෙනෙකුයි.ගිහින් උපදේශයක් ගනින්.කිරි ගහට පිහියෙන් ඇන්න වගේ වැඩේ හරියනවා.ලෝයර්ස් විතරක් නෙමෙයි අහවල් අහවල් නඩුකාර මහත්තයල නෝනලත් එතනට යනවා.” මේ කතාව අහල මම උඩගොස් බිම වැටෙන්න කාරණා කිහිපයක්ම තිබුණා.එකක් නම් ගොඩේ බයියන් වූ අප වැන්නන් කෙසේ වෙතත් මම නිසැකවම දන්නා ආකාරයට මහපාරේ බස් එකක ගමනක් නොගිය,සිංහලට වඩා ඉංග්‍රීසියට හුරුවක් ඇති,අපි වගේ ඔිපදූප පත්තර වෙබ් සයිට් නොව ඩේලි නිව්ස්, සන්ඩේ ටයිම්ස් විතරක් කියවන,අපි වගේ චාරයක් නැතිව ඔිනෑම එකෙක් ආශ්‍රය කිරීමේ පුරුද්දක් නැති,හන්දියේ කඩේකින් තේ එකක් බීලා නැති ,වැඩ ඇරුනු ගමන් ගෙදර යන , නිතරම ගෙදර දොර වහගෙන ඉන්න, බෙල්කරාම ජනේලයෙන් බලලා ඊට පස්සේ දොර අරින(ඒකාලේ මේතරම් CCTV ජනප්‍රිය නොවීය.)දැඩි ක්‍රිස්තියානු භක්තික,නගරයේම ඉපිද නගරයේම වාසය කරමින් කටුවක් තුළ වෙසෙන්නෙකු වැනි වූ මේකා ,මෙවැනි විශ්වාස වලට ගොදුරු වූයේ කෙසේද ? යන්නය.අනෙක් කරුණ වන්නේ ඔහු නොදැන සිටිමුත් ඒ කියූ ඥානම්මා මෑණියන් හා සිරිසේන මහත්තයා පියාණන් වහන්සේලා දැන් ඉන්න තත්වයට පෙර සිටි තත්වයේ පටන් ඒකලා ගැන මම දන්නා බවයි.ඒ විශේෂ බලයකින් නොව අනුරාධපුර නගරය පමණක් නොව එතැන් සිට ත්‍රිකුණාමලය දක්වා වූ භූමි ප්‍රදේශය තුළ දුම්රිය ස්ථාන,බස් හෝල්ට්,කඩ පිල්, බාර්,විශ්‍රාම ශාලා,ලැගුම් හල් ,යාළු හිතමිතුරන්ගේ ගෙවල්,ප්‍රසිද්ධ වැසිකිලි යනාදිය වසර ගණනාවක් තිස්සේ ගෙදර සේ හුරුවෙන තරමට ඔබ නොබ ගාටමින් ගත තළ ජීවිතය ඔස්සේ ලබාගත් අත්දැකීම් ආශ්‍රයෙන්ය.

දැන් ලොකු ලොක්කන් හා පයිරු පාසානම් පවත්වන ඥානම්මා අනුරාධපුර ඉස්පිරිතාලයේ ටෙලිෆෝන් ඔපරේටර්වරියක ලෙස සාමාන්‍ය මිනිසුන් සමඟ පණිවිඩ සන්නිවේදනය කරගත් බව දැනසිටි මා ලංකාව නම් පුදුම ඇටය තුළ ඇන්දවීම කොතරම් සාර්ථක ව්‍යාපාරයක් විය හැකිදැයි සන්ත්‍රාසට පත්ව සිටිමි. ……………………මහත්තයා පියාණන් වහන්සේ ගැන කියන්නේ නම් එතුමා උපගුරුවරයෙකු කොටි ගහන මායිම් ගම්මානයක කට්ට කඨෝර ජීවිතයක් ගතකරමින් සිටි එකල ගෙදර තිබූ එකම වාහනය වූ තැපැල් නයින්ටියේ ගමනාගමනයේ යෙදෙමින් සිටබෑන්ඩ් නිව් ප්‍රිමියෝ හා අවුඩියක් කරා ආ ගමන උත්කුෂ්ටය.එමෙන්ම ඈත දකුණේ සිට වන්නිය තෙක් ගමනක් ආ රැඩිකල් ගති පැවතුම් තිබූ කාන්තාවක වූ බිරිඳ හා එතුමා අතර යහපත් පවුල් ජීවිතයක් නොතිබූ බවත්,ඔහු හා ඇය එකම ගෙදර වෙනත් කාමර දෙකක එකිනෙකාට ස්වාධීන ජීවිතයක් ගත කළ බව ළඟින් ඇසුරු කළ අයට නොරහසකි.කෙසේ වුවද මා හොඳින් දැන සිටි ඒ සුන්දර කාන්තාවගේ හදිසි මරණයෙන් පසුව දැන් ඉතාමත් ගැටවර යුවතියක සමඟ එතුමා ගෙනයන යුග දිවිය අති විශිෂ්ඨය.

ඒ කුමක් වෙතත් රුවන්වැල්ලේ සෝභිත හිමි නමින් කාලයක් රට ඇන්ඳු අංකොක්කාවල සුනිල් ශාන්ත හා සක්විති රණසිංහ ලා ගැන මීට පෙර කොතෙකුත් හෙළිකිරීම් කළ මුත් එක කපටියෙකුට පසුව තවත් කපටියෙකුට යනාදී වශයෙන් රැවටීම් වැලකට ගොදුරු වෙනවා විනා අඩුම තරමේ නිතරම කරගහගෙන යන  ඕනෑම එහෙකදී ඉස්සරහට දමන  බුදු දහමේ එන ඉගැන්වීම් වලට අනුව හෝ කල්පනා නොකරන ජාතියක හැසිරීම තව කල්ප කාලයක් ගියත් මෙසේම වනු නිසැකය. .කාලි මෑණියන්ගේ පිහිටයි ආරස්සාවයි!